Forrest Gump Filminin Orijinal Analizi

1994-cü ilin kinematoqrafiyada çox məhsuldar bir il olmasını daha
əvvəl qeyd etmişdik. Həmin ildə çəkilmiş ən çox səs gətirən filmlərdən biri də rejissorluğunu Robert Zemeckis`in etdiyi Forrest Gump filmidir. Film əqli cəhətdən zəif olan Forrest Gump`ın başına gələn hadisələrdən bəhs edir.

Winston Groom`un eyni adlı romanından uyğunlaşdırılmış ssenari əsasında çəkilən film IQ səviyyəsi normal insanlarınkından bir qədər aşağı olan və öyrənmədə çətinlik çəkən, ancaq fiziki bacarıqları olduqca inkişaf etmiş gəncin cəmiyyətdəki rolunu və onun gözündən dünyanı olduqca maraqlı təsvir edərək izləyicini təsirləndirməyi bacarır. Tom Hanks`in möhtəşəm ifası ilə zənginləşən film ümumilikdə 13 nominasiyada Akademiya mükafatına namizəd göstərilmiş və ən yaxşı film, ən yaxşı baş rol aktyor, ən yaxşı rejissor və ən yaxşı uyğunlaşdırılmış ssenari kimi önəmli nominasiyalar da daxil olmaqla, 6 nominasiyada Oskarı qazanmışdır. Film 8.8 IMDb xalı ilə hal hazırda dünyada 14-cü yerdədir.

Qeyd edək ki, filmin rejissorluğunu etmək üçün Zemeckisdən əvvəl Terry Gilliam və Barry Sonnenfeld`ə təklif olunmuşdu amma onlar bu şansı geri çevirdilər. Eyni zamanda, Forrest Gump rolu da Bill Murray, John Travolta və Chevy Chase kimi aktyorlara təklif olunmuşdu və onlar rolu qəbul etmədilər. Travolta, daha sonra bunun bir səhv olduğunu etiraf etmişdi.

Tom Hanks isə ssenarini 1.5 saat boyunca oxuduqdan sonra rolu yalnız filmdəki bütün hadisələr gerçək hadisələr əsasında çəkilərsə qəbul edəcəyini dedi. Filmdəki məşhur “Adım Forrest Gump`dır. İnsanlar mənə Forrest Gump deyirlər.” sözləri əslində ssenaridə yox idi, bu sözləri Tom Hanks əlavə etmişdi və rejissor da çox bəyəndiyi üçün ssenariyə daxil etmişdi.

Filmin ilk səhnələrində bizə Forrest Gump`ın uşaqlığı göstərilir. Forrrestin ilk dəfə məktəb avtobusuna mindiyi səhnədə avtobusda onun yanına oturmasına icazə verməyən uşaq rejissor Robert Zemeckis`in oğlu Alexander Zemeckisdir.

Avtobusdakı qızıl saçlı qız isə Tom Hanks`in qızı Elizabeth Hanks idi.

Forrest`in uşaqlıq dövründə onların evində Elvis Presleyin kirayə qaldığını görürük. Filmdə onu Kurt Russell səsləndirirdi.

Filmdə Forrest Gump`ın anasını canlandıran məşhur aktrisa Sally Field əslində Tom Hanks`dan cəmi 10 yaş böyükdür.

Jenny Curran rolu isə Robin Wright`dan əvvəl Demi Moore və NicoleKidman kimi aktrisalara təklif olunmuş, lakin hər ikisi rolu rədd etmişdi.

Robin Wright`ın gecə klubu səhnələri çəkilərkən aktrisa demək olar ki, tamamilə çılpaq olduğundan, xəstələnmişdi. Buna baxmayaraq, çəkilişlər saxlanılmamış və bu səhnələr fasiləsiz 24 saata çəkilmişdi. Maraqlı faktlardan biri də odur ki, Forrest`in bir çox qaçış səhnələrində Tom Hanks`in kiçik qardaşı Jim Hanks onun dublyorluğunu etmişdi.

Filmin çox hissəsində Forrestin oturduğu skamya, Chippewa Meydanı'nda, tarixi Savannah, Georgia`da idi. Daha sonra onu hava şəraiti səbəbindən köhnəlməməsi və ya oğurlanmaması üçün bir muzeyə yerləşdirdilər.

Filmdə Forrest Gump Vyetnam müharibəsində iştirak edir və burada o leytenant Dan Taylor (Gary Sinise) və Bubba Blue (Mykelti Williamson) ilə tanış olur. Qeyd etmək lazımdır ki, bu film Tom Hanks və Gary Sinise`in birlikdə oynadığı üç filmdən biridir ( digər iki film isə Apollo 13 və The Green Mile`dır).

Forrest orduda stolüstü tennis oynamağa başlayır və bir çox çempionatda iştirak edir. Əslində bu matçların çəkilişi zamanı heç topdan istifadə olunmurdu.

Müharibədən qayıdan zaman Forrest səhvən Vaşinqtonda bir mitinqə gəlir və ondan çıxış etməsini istəyirlər. Forrest danışmağa başlayanda mikrofonu söndürülür və biz onu eşidə bilmirik. Tom Hanks bir müsahibəsində bildirmişdi ki, bu səhnədə Forrest`in dediyi sözlər belə idi: “İnsanlar Vyetnama gedəndə bəzən evə analarının yanına bir ayağı olmadan qayıdırlar. Bəzən isə heç qayıda bilmirlər. Bu pis bir şeydir . Bu mövzuda deyəcəklərim bu qədərdir."

Müharibədən sonra Vyetnamdakı fəaliyyətlərinə görə Forrest`ə medal verildiyi səhnədə həqiqi görüntülərdən istifadə edilmişdi. Prezident Lyndon Johnson`un 19 noyabr 1968 tarixində Sammy L. Davis`ə medal verdiyi mərasimin görüntülərində Tom Hanks`in başı Davis`in bədəninə montajlanaraq filmə əlavə olunmuşdur.